Ábrese o prazo para participar no concurso VERBAS PARA... COMUNICAR 2017. Este concurso impulsado polo Concello de Soutomaior, a través da Concellería de Xuventude, vai dirixido a mozos e mozas de 12 a 20 anos empadroados/as no municipio.
Co gallo do Día das Letras Galegas nace este concurso fai dez anos co fin de promover o uso da lingua galega entre a mocidade para que aumente a súa normalización nos contextos informais nos que a mocidade se comunica.
Este ano o concurso ten como novidade a ampliación de modalidades de presentación pois incorporamos, á modalidade de redacción unha nova que é a modalidade audiovisual para que a mocidade poida presentarse usando ás novas tecnoloxías de comunicación. A participación consiste na presentación dun traballo en lingua galega que pode vir presentado en formato redacción ou audiovisual onde o texto ou audio do traballo presentado transmita unha idea, sentimento, opinión, etc., que se desexe comunicar ou compartir con outras persoas.
Haberá 6 premios en cada categoría por modalidade e un agasallo para todas as persoas que participen no concurso.
O prazo de presentación remata o 28 de abril.
As bases poden solicitarse na OMIX ou ben descargarse na web www.soutomaior.com ou en: Verbas para... comunicar