Coincidindo co día internacional da nena na ciencia, o Concello de Soutomaior presentou onte unha nova iniciativa organizada de forma conxunta polas concellerías de Igualdade, Xuventude e Educación, “Soutomaior coa Ciencia”. Creada co obxectivo de fomentar a cultura científica entre a cidadanía mediante charlas e talleres interactivos, a iniciativa xorde da gran aceptación da Semana da Ciencia creada o ano pasado, polo que se ampliou dunha semana a dous meses

Os centros educativos do municipio serán os escenarios principais de “Soutomaior coa Ciencia”. Neles levarán a cabo diversas actividades durante as próximas catro semanas, como os talleres de realidade virtual nos que os alumnos aprenderán a crear mundos dixitais coa aplicación CoSpaces, o ciclo de iniciación a astronáutica e creación de foguetes, o Scape Room “ Camiños da ciencia” e a Feira das Ciencias na que o alumnado exporán os seus proxectos científicos.

Do mesmo xeito, durante todo o mes, a Biblioteca Municipal Luís Seoane  contará cun punto de lectura específico para poñer en valor o papel das mulleres na historia da ciencia e dar visibilidade ás grandes fazañas científicas que viron a luz grazas a mulleres como Marie Curie, Rosalin Franklin ou Beira Rubin.

A iniciativa inclúe máis de 10 actividades dirixidas á veciñanza de todas as idades, desde os talleres e museos interactivos dirixidos aos máis pequenos e pequenas á actividade “ Coméndonos a ciencia”, no que membros do Centro de Día “ Boas Apertas” de Arcade e persoas maiores de 55 anos aprenderán toda a ciencia que está detrás dos alimentos e que finalizará coa preparación dunha receita de cociña molecular.

“Soutomaior coa Ciencia” inicia este venres no multiusos de Arcade coa presentación do programa e o relatorio sobre desenvolvemento sostible da ONU á que asistirá o alumnado de 4º da ESO do IES Soutomaior e o Colexio Apóstol Santiago.

Todas as actividades son completamente de balde e para algunhas delas será necesario inscribirse previamente EN LIÑA a través da web do Concello de Soutomaior www.gabinetesoutomaior.com  onde tamén está dispoñible o programa completo.