Onte, o alcalde de Soutomaior, Agustín Reguera, e as concelleiras de Xuventude e Educación, Noelia Ocampo e Fátima Vidal, presentaron a programación do Concello de cara á celebración do Día das Letras Galegas o próximo 17 de maio.
Este ano o Concello preparou un programa de actividades que se estenderá ao longo de dúas semanas. Este domingo, os máis pequenos poderán gozar dunha sesión de Teatro Para Bebés, coa función “Os tres porquiños”.
A seguinte cita será o día 11 de maio, cando está programado o XIV Concurso Verbas para Comunicar, no que o alumnado de ESO e Bacharelato que se inscribiu competirá a través de textos e traballos audiovisuais por ser o/a mellor comunicador/a, utilizando o galego como medio. Doutra banda, a partir do día 14 e ata o 22 de maio a veciñanza de Soutomaior e o alumnado dos centros escolares do Concello poderán participar en “ Penso, logo existo”, unha campaña que busca fomentar a difusión de ideas, opinións e pensamentos en galego a través das redes sociais.
Con todo, o gran evento chegará o propio día 17 de maio, o Día das Letras Galegas. Ese día Talo Río encherase de xente grazas ao obradoiro ‘ Verbas na rúa’ e á actuación do grupo Caribantes de Ponte Caldelas, que poñerá o toque musical á velada a partir das 18.00 horas.
Por último, pechará esta programación de actividades o espectáculo dirixido ao público infantil “ Brinca Vai”, que terá lugar o día 20 ás 18.30 horas na Biblioteca.