Onte, o alcalde de Soutomaior, e as concelleiras de Xuventude e Educación presentaron o programa ‘ Hai Plan! Soutoverán’. Trátase do programa xuvenil de Lecer e Tempo Libre deste verán que este ano vén cargado de sorpresas e plans para todos os públicos.
Destaca, por exemplo, a celebración do Festival “ SoutoMareiro” que traerá ao Peirao de Arcade as actuacións de Grande Amore, Chaleco Reflectante e EME DJ. Pero tamén haberá tempo para obradoiros; voluntariados; campamentos de inglés; deporte; concursos e moitas outras actividades.
Neste sentido, o alcalde de Soutomaior, Agustín Reguera, sinalou a importancia de organizar actividades para a poboación máis nova, “como unha forma de fomentar o comercio local e evitar que os/as adolescentes e adultos/as mozos/as se despracen aos concellos limítrofes para gozar dos seus momentos de lecer”
Para iso, este verán púxose todo o empeño en crear unha programación que poida contentar a todos e todas, con actividades que, ademais, espérase que atraian a Soutomaior a mozos e mozas doutros Concellos e mesmo doutros países, como é o caso do campo de voluntariado internacional.